အင်းတော်ကြီးဒေသတွင် မိုးသည်းထန်စွာ ရွာသွန်းမှုကြောင့် ရေကြီးရေလျှံမှု ဖြစ်ပွားခဲ့ပြီး လူနေအိမ်နှင့် လယ်ယာမြေများ ပျက်စီး
EPN
အင်းတော်ကြီး ဇူလိူင်၂၇
ကချင်ပြည်နယ်၊ မိုးညှင်းမြို့နယ်၊ အင်းတော်ကြီးဒေသ၊ နန့်မွန်းမြို့နှင့် မိုင်းနောင်ကျေးရွာတို့တွင် ဇူလိူင်လ ၂၇ ရက်နေ့၊ ည၂နာရီ အချိန်တွင် မိုးသည်းထန်စွာ ရွာသွန်းမှုကြောင့် လူနေအိမ်နှင့် စိုက်ပျိုးလယ်ယာမြေများ နစ်မြုပ်ပျက်စီး ဆုံးရှုံးမှုများ ဖြစ်ပေါ်ခဲ့သည်ဟု ဒေသခံများထံက သိရသည်။
” ညက မိုးအရမ်းရွာတာ။ မနက်အိပ်ယာကနိုးပြီး အိမ်အောက်ကို ဆင်းကြည့်လိုက်တော့ အိပ်အောက်မှာထားတဲ့ အိုးခွက်ပန်းကန်၊ ဆိုင်ကယ်၊ စပါးကျည်တွေနဲ့ အခြားပစ္စည်းတွေ ရေမျောသွားခဲ့ပြီ။ ဆင်းပြီး ဆယ်ရအောင်ကလဲ ရေက လူတရပ်လောက်ရှိတယ်။ ရေစီးကလဲသန်တော့ ဆင်းလို့မရဘူး။ ဒီမနက်ရေကျသွားမှပဲ လိုက်ဆယ်ယူရတယ်။ အခုလောလောဆယ်ကတော့ ရေသန့်နဲ့ ထမင်းချက်စားဖို့ အဆင်မပြေတော့ဘူး ” ဟု အသက် ၃၅ နှစ်အရွယ်ခန့်ရှိသော ရွာသူတစ်ဦးက ပြောသည်။
“အခုညက မိုးရွာလို့ လယ်ထဲသွားကြည့်တာ။ စိုက်ထားတာ ရက်ပိုင်းပဲ ရှိသေးတယ်။ တောင်ကျချောင်းက ရေတွေကြီးတော့ တာဘောင်၊ ကန်သင်းတွေကျိုးပေါက်ပြီး၊ လယ်ထဲက စိုက်ပျိုးထားတဲ့ စပါးတွေ အကုန်လုံးနီးပါး ပျက်စီးသွားကုန်တာ။ ဘယ်လိုမှ ပြန်ပြုပြင်လို့မရတော့ဘူး။ ဒိုက်တွေ၊ အမှိုက်တွေ၊ သဲနုန်းတွေနဲ့ လယ်ထဲမှာ စပါးပင်တောင် မရှိတော့ဘူး ” ဟု လယ်သမားတစ်ဦးက ထပ်မံပြောသည်။
ထို့အပြင် အသက်၄၅နှစ်အရွယ်ရှိ အမျိုးသားတစ်ဦးကလည်း “မနက်အစောပိုင်းက နန့်မွန်းကနေ မိုင်းနောင်ဘက်ကို ဆိုင်ကယ်နဲ့ စျေးရောင်းလာတဲ့ စျေးသည်တစ်ဦး ကျွန်တော်အရှေ့ကနေ ကားလမ်းမကို ရေကျော်နေတာကို ဖြတ်မောင်းတာ။ လူရော၊ ဆိုင်ကယ်ရော ရေထဲမျောပါသွားတာ။ လယ်တဲမှာရှိတဲ့ အမျိုးသားတစ်ဦးက ကယ်ဆယ်ပေးလိုက်တယ်။ လူလဲဒဏ်ရာရလို့လမ်းမလျှောက်နိုင်ဘူး။ သုံးဘီးဆိုင်ကယ်နဲ့ တင်ခေါ်သွားလိုက်ရတယ်။ ရေကအရမ်းကြီးတော့ သွားလို့လာလို့အဆင်မပြေဘူး။ အခုတော့ ရေကျသွားပါပြီး ” ဟု ပြောသည်။
အဆိုပါ မိုးသည်းထန်စွာ ရွာသွန်းမှုကြောင့် နန့်မွန်းမြို့နှင့် မိုင်းနောင်ကျေးရွာကြားလယ်ယာမြေ အများအပြား ပျက်စီးဆုံးရှုံးကာ မိုင်းနောင်ကျေးရွာ အထက်တန်းကျောင်းရှိ ကျောင်းရှေ့ ဆိုင်ဘုတ်နှင့် အုတ်တံတိုင်းနံရံ ပြိုကျပျက်စီးခဲ့ပြီး၊ မိုင်းနောင်ကျေးရွာ လူနေအိမ်ခြေ ၈၀ ကျော်ခန့် ပျက်စီးမှုအချို့ရှိခဲ့ကြောင်း သိရသည်။
၎င်းအပြင် နန့်မွန်းမြို့ ချောင်းနဘေး မြေအနိမ့်ပိုင်း အိမ်ခြေများရေလွှမ်းမှု ဖြစ်ပွားခဲ့ပြီး၊ အင်းတော်ကြီး – ဟိုပင်သွား တောင်ပေါ်ကားလမ်းမကြီးတွင် တောင်ပြိုကျ၍ ကားလမ်းခေတ္တ ပိတ်ဆို့မှုများ ဖြစ်ပေါ်ခဲ့သည်ဟု ဒေသခံများထံက သိရသည်။
နေကြာ