ဆိုင်ကယ်ပြင်နေတဲ့ လူ ၁ ဦး လမ်းဘေးသစ်ပင် ပိလို့ သေဆုံး
EPN
မုံရွာ ၊ သြဂုတ် ၁
စစ်ကိုင်းတိုင်း ၊ မုံရွာမြို့ ၊ ဘုန်းစိုးရပ်ကွက် ၊ သာစည်လမ်း ၊ သာစည်ဈေးအနီးက သက်တမ်းရင့် လမ်းဘေးသစ်ပင် ၁ ပင်ဟာ မနေ့ ဇူလိုင် ၃၁ ရက် နေ့လည်ပိုင်းက အမြစ်ကနေ ကျွတ်လဲခဲ့တာကြောင့် အဲ့ဒီ အနီးက ဆိုင်ကယ်ပြင်ဆိုင်ပေါ်ကို ပိကာ ဆိုင်ကယ်ပြင်နေတဲ့ လူ ၁ ဦး သေဆုံးခဲ့တယ်လို့ မုံရွာခရိုင် မီးသတ်ဌာနဆီက သိရပါတယ်။
” မနေ့က နေ့လည် ၁ နာရီဝန်းကျင်မှာ ရုတ်တရက် မိုးသက်လေးပြင်းကျရောက်ပြီး သာစည်လမ်းက သက်တမ်းရင့် တမာပင်ကြီး အမြစ်ကနေ ကျွတ်လဲတယ် ၊ အနားက ဆိုင်ကယ်ပြင်ဆိုင်ကို ပိတယ် ၊ အဲဒီမှာ ဆိုင်ကယ်ပြင်ရင်း မိုးခိုနေတဲ့ လူ ၁ ဦး ပေါ်ကို ပိတာကြောင့် သေသွားတာ” လို့ ရှာဖွယ်ကယ်ရေး မီးသတ်တယောက်က ပြောပါတယ်။
ဒါ့အပြင် လူမှုကယ်ဆယ်ရေး စေတနာ့လုပ်သား တယောက်က ” ဖိုးထက် ဆိုတဲ့ ဆိုင်ကယ်ပြင်ဆိုင်ပေါ်ကို သစ်ပင်ပိတာပါ ၊ အဲ့ဒီဆိုင်ထဲမှာ ဆိုင်ကယ်လာပြင်တဲ့ ကိုထက်အောင်လွင် ဆိုတဲ့သူအပေါ် ပိပြီး သေတာ ” လို့ ပြောပါတယ်။
အဲ့ဒီ လူသေဆုံးတဲ့ ကိစ္စကို မုံရွာနယ်မြေရဲစခန်းက သေမှုသေခင်းဖွင့်ထားတယ်လို့ သိရပါတယ်။
ဒါ့အပြင် လွန်ခဲ့တဲ့ ၇ နှစ်ဝန်းကျင်က အခု သစ်ပြိုလဲတဲ့ သာစည်လမ်းကို ခရိုင်ချင်ဆက် ကုန်စည်ပို့ဆောင်ရေး အဝေးပြေးလမ်း မကြီးအဆင့် မြင့်တင်ဖို့ နဲ့ အဆင့်မြင့် မြို့ပြစီမံကိန်းအတွက် သစ်ပင်တွေခုတ်လှဲပြီး အစားထိုးသစ်ပင်တွေ ပြန်စိုက်ဖို့ လုပ်တဲ့အခါ လူတစုက တားမြစ်ကန့်ကွက်ခဲ့တာကြောင့် အဲ့ဒီ သာစည်လမ်းမှာ သက်တမ်းရင့် သစ်ပင်ကြီးတွေ ရှိနေပြီး နှစ်တိုင်းလိုလို လဲကျပြီး လူတွေဒုက္ခရောက်နေရတာလို့ သိရပါတယ်။
သွန်းသွန်း