ဖားကန့်မြို့နယ် ရဲတပ်ရင်း (၃၀) ဝန်းအတွင်း ဗုံးနှစ်လုံးပေါက်ကွဲမှုဖြစ်ပွား
EPN
မြစ်ကြီးနား၊ နိုဝင်ဘာ ၈
ကချင်ပြည်နယ် ဖားကန့်မြို့နယ်တွင် ယမန့်နေ့ နိုဝင်ဘာလ (၇)ရက်နေ့ (တန်ဆောင်တိုင်ည) ညနေ (၅)နာရီခန့်က ရဲတပ်ရင်း (၃၀) ဝန်းအတွင်း ဗုံးနှစ်လုံးပေါက်ကွဲမှုဖြစ်ပွားခဲ့ကြောင်း သိရသည်။
ဗုံးပေါက်ကွဲခဲ့သည့်နေရာမှာ ဆိုင်းတောင်းကျေးရွာအုပ်စု ဖားကန့် ရဲတပ်ရင်း (၃၀) စခန်းကုန်း ဝန်းအတွင်းဖြစ်ပြီး ရဲအချို့ ထိခိုက်ဒဏ်ရာရရှိခဲ့ကြောင်း အနီးအနားရှိ ဒေသခံတစ်ဦးကပြောသည်။
“ မနေ့က ညနေ (၅)နာရီလောက်မှာဖြစ်သွားတာ နှစ်လုံးကွဲသံကြားလိုက်ရတယ်၊ ရှေ့ဆင့်နောက်ဆင့်ပဲ ၊ ကွဲတာ ၊ ထိခိုက်မှုတော့မသိရဘူး၊ အဝေးကပစ်တယ်လို့ကြားရတယ်၊အထဲကိုကျတော့ ရဲတစ်ချို့ထိသွားတယ်ကြားတယ်” ဟု ၎င်းကပြောသည်။
ယင်းနောက် ည(၈)နာရီခွဲတွင် ရဲတပ်ရင်း (၃၀) စခန်းကုန်းအနီး တစ်ဝိုက် သေနတ်သံမျာကြားခဲ့ရပြီး နာရီဝက်ခန့်အကြာ ရပ်တန့်သွားခဲ့ကြောင်း သိရသည်။
အလားတူ နိုဝင်ဘာလ (၄)ရက်နေ့ ညနေ (၅)နာရီခွဲခန့်က မှော်ဝမ်းရပ်ကွက် ရှိ မြန်မာ့စီးပွားရေးဘဏ်အနီး ပေါက်ကွဲမှုဖြစ်ပွားခဲ့ကာ ဘဏ်လုံခြုံရေးစောင့်နေသည့် ရဲတပ်ဖွဲ့ဝင် (၃)ဦး ထိခိုက်ဒဏ်ရာရရှိခဲ့ကြောင်းသိရသည်။
ဗညားနွဲ့