ဗန်းမောက်မြို့နယ်ထဲမှာ ရွှေတူးဖော်ရေး လုပ်ကွက်များ မကြာခဏ ဆက်ကြေးပေးနေရ
EPN
ဗန်းမောက်၊ မတ် ၁၁
စစ်ကိုင်းတိုင်း ဒေသကြီး၊ ကသာခရိုင်၊ ဗန်းမောက်မြို့နယ် မြောက်ပိုင်းက ဘူးတောင်း၊ ခေါင်းတုံးကျေးရွာ နဲ့ အင်းပေါက်ကျေးရွာတွေမှာရှိတဲ့ ရွှေတူးဖော်ရေး လုပ်ကွက်တွေဆီကို လက်နက်ကိုင်အဖွဲ့တွေက မကြာခဏ ဆက်ကြေးဝင်ကောက်နေတဲ့အတွက် ရွှေလုပ်ငန်းတွေ ရပ်နားထားကြတယ်လို့ လုပ်ငန်းရှင်တွေဆီက သိရပါတယ်။
“အခုလ ၁ ရက်နေ့က ဆက်ကြေးလာကောက်တယ်၊ ဘက်ဟိုးတစ်စီးကို သိန်း ၂၀ ပေးရတယ်၊ ကောက်ပြီးတာ တစ်ပတ်ကျော်ပဲရှိသေးတာ ၉ ရက်နေ့က နောက်တစ်ကြိမ် လာကောက်ပြန်တယ် လက်နက်ကိုင်အဖွဲ့တွေ လာကောက်တာပါ ” လို့ လုံခြုံရေးအရ အမည်မဖော်လိုတဲ့ ရွှေတူးဖော်ရေး လုပ်ငန်းရှင် တစ်ဦးက ပြောပါတယ်။
ဒါ့အပြင် အခုလ ၉ ရက်နေ့ကလည်း ရွှေတူးဖော်ရေး လုပ်သားတွေရဲ့ စားသောက်ကုန်တွေကို ရိက္ခာအဖြစ် လာရောက်ယူဆောင်တာတွေ ရှိတယ်လို့ ပြောပါတယ်။
ဗန်းမောက်မြို့နယ်ထဲက ရွှေလုပ်ငန်းတချို့ဟာ စက်သုံးဆီ ပြတ်လတ်မှု ဖြစ်တဲ့အတွက် လုပ်ငန်းတွေ နားထားကြသလို စက်သုံးဆီ အလုံအလောက်ရှိတဲ့ လုပ်ကွက်တွေကလည် အကြမ်းဖက်သမားတွေ မကြာခဏ ဆက်ကြေး လာကောက်ခံနေတာကြောင့် လုပ်ငန်းတွေ နားထားရတယ်လို့ သိရပါတယ်။
သွန်းသွန်း