ဗန်းမောက်မြို့မဘိနယ် မံမော်ကြိုးဝိုင်းအတွင်း၌ တရားမဝင် ကျွန်းသစ်နှင့် အခြားဆက်စပ်ပစ္စည်းများ သိမ်းဆည်းရမိ

စစ်ကိုင်းတိုင်းဒေသကြီး၊ ကသာခရိုင်၊ ဗန်းမောက်မြို့နယ်၊ မြို့မဘိနယ်၊ မံမော်ကြိုးဝိုင်းအတွင်း၌ တရားမဝင် ကျွန်းသစ် (၁)တန်ကျော်နှင့် အခြားဆက်စပ်ပစ္စည်းများ သိမ်းဆည်းရမိခဲ့ကြောင်း မြို့နယ်သစ်တောဦးစီးဌာနမှ သိရသည်။

ဖြစ်စဥ်မှာ ဗန်းမောက်မြို့နယ် သစ်တောရုံးမှ သစ်တောဦးစီးမှူး ဦးခိုင်မွန် ဦးဆောင်ကာ မြို့မ(ဘိ)နယ် တာဝန်ခံတောအုပ် ဦးအောင်သိန်းဇော်၊ တောအုပ်ကြီး ရဲဝင့်နိုင်၊ တောအုပ်​ကြီး ဦးလှိုင်ထက်ကို၊ တောအုပ် ဦးလင်းထိန်၊ တောအုပ် ဦးရဲမြင့်ဆွေ၊ တောခေါင်း မိုးမင်းဦး၊ ဗန်းမောက်မြို့နယ် သစ်တောလုံခြုံရေး ရဲတပ်ဖွဲ့ တပ်ကြပ်ကြီး မြင့်ဆွေနှင့်တပ်ဖွဲ့ဝင်(၃)ဦးတို့ ပါဝင်သော ဖမ်းဆီးရေးအဖွဲ့သည် မံမော်ကြိုးဝိုင်းအတွင်းရှိ ကျွန်းသစ်ပင်များ ခုတ်လှဲ၍ သစ်စက်များ​ဖြင့် ပျဥ်ထိုး ဝိုင်းလည်နေကြောင်း သတင်းအရ လိုက်လံရှာဖွေခဲ့ကြရာ ဧပြီလ ၂၈ ရက်နေ့ နံနက် ၁၁ နာရီခွဲအချိန်ခန့်တွင် ဗန်းမောက်မြို့မ(ဘိ)နယ်၊ မံမော်ကြိုးဝိုင်း၊ အကွက်အမှတ် (၉၃)အတွင်း 46RGM- 992989 နေရာ၌ တရားမဝင် ကျွန်းသစ်ခွဲသား ဆိုဒ်စုံ (၅၅)ချောင်း၊ (၁.၀၄၈၈)တန်၊CHAN GCHAI (၂၅)ကောင် (၁)လုံး၊ ၄ ပေလွှဝိုင်း (၁) ဝိုင်း၊ ၄ ပေ ရှပ်တန်း (၁)ခုနှင့် အခြားဆက်စပ်ပစ္စည်းတို့အား ပိုင်ရှင်မဲ့ သိမ်းဆည်းရမိခဲ့ကြသည်။

ဖြစ်စဥ်နှင့်ပတ်သက်၍ တရားမဝင် ကျွန်းသစ်ခွဲသား ခိုးထုတ်သူများအား အမြန်ဆုံး ဖမ်းဆီရမိရေးနှင့် သစ်တော ဥပဒေအရ တရားစွဲတင်ပို့နိုင်ရေးအတွက် မြို့နယ်သစ်တောဦးစီးဌာနက စုံစမ်းစစ်ဆေးလျက်ရှိကြောင်း သိရသည်။

ဗန်းမော်သုခမိန်