ခလုံးကျေးရွာအနီး မိုးရွာသွန်းကြောင့် လမ်းပြိုကျမှုဖြစ်ပွားကာ သွားလာရခက်ခဲနေ
EPN
မြစ်ကြီးနား၊ ဇူလိုင် ၁၂
ကချင်ပြည်နယ်၊ တနိုင်းခရိုင်၊ ရှင်ဗွေယန်မြို့နယ်ရှိ ခလုံးကျေးရွာ ဘုန်းကြီးကျောင်းအနီး လမ်းမကြီးတွင် မိုးရွာသွန်းမှုကြောင့် လမ်းပြိုကျကာ သွားလာရေးခက်ခဲနေကြောင်း သိရသည်။
အဆိုပါလမ်းမှာ ခလုံးကျေးရွာနှင့် တစိတ်ကျေးရွာကြားရှိ မိန်းလမ်းမကြီးဖြစ်ပြီး၊ ယမန်နေ့ည မိုးသည်းထန်စွာ ရွာသွန်းခဲ့သည့်အတွက် ယနေ့နံနက်ပိုင်းက ပြိုကျခဲ့ကြောင်း ဒေသခံတစ်ဦးက ပြောသည်။
” မိုးအရမ်းရွာတော့ ရေတွေတိုက်စားပြီးပြိုကျသွားတာပေါ့။ လမ်းကအစကတည်းက နည်းနည်းချင်းတော့ပြို ကျနေပြီ။ ပြုပြင်တာတွေ မလုပ်ပေးလို့ အခုတော့အကုန် ပြိုသွားတာပေါ့။ ဒီလမ်းက မိန်းလမ်းမကြီးဆိုတော့ တနိုင်း – ရှင်ဗွေယန်၊ ရှင်ဗွေယန် – မြစ်ကြီးနား သွားတဲ့ကားတွေလည်း သွားလို့မရတော့ဘူး။ ဟိုဘက်ရွာနဲ့ ဒီဘက်ရွာတောင် ဆိုင်ကယ်နဲ့သွားလို့ မရတော့ဘူး ” ဟု ၎င်းကဆိုသည်။
ယင်း မိန်းလမ်းမကြီး ပြိုကျပျက်စီးမှုကြောင့် မြစ်ကြီးနားမှ ရှင်ဗွေယန်သို့ ခရီးသွားယာဉ်များလည်း ရပ်နားထားရပြီး၊ ကျေးရွာရှိ ဒေသခံများလည်း သွားလာ၍ မရနိုင်သည့်အတွက် တာဝန်ရှိသူများမှ အမြန်ဆုံး ပြုပြင်ဆောင်ရွက်ပေးစေလိုကြောင်း ဒေသခံများက တောင်းဆိုကြသည်။
သံလွင်