ပူတာအိုမြို့တွင် ခရမ်းချဉ်သီးတစ်ပိဿာ ကျပ်နှစ်သောင်းထိ ဈေးမြင့်တက်
EPN
မြစ်ကြီးနား၊ မတ် ၂၃ (၂၀၂၄)
ကချင်ပြည်နယ် ပူတာအိုမြို့တွင် ခရမ်းချဉ်သီးတစ်ပိဿာကို ကျပ်နှစ်သောင်းထိ ဈေးမြင့်တက်နေပြီဖြစ် ကြောင်း ဒေသခံများထံမှ သိရသည်။
မြစ်ကြီးနား-ပူတာအိုသွားလမ်းပိုင်း ပိတ်ထားသည်မှာ လဝတ်ကျော်ရှိလာပြီဖြစ်ကာ ပူတာအိုမြို့တွင် ကုန်ပစ္စည်းများရှားပါးလာပြီး မီးဖိုချောင်သုံးပစ္စည်း ခရမ်းချဉ်သီးတစ်ပိဿာကိုပင် ကျပ် ၂၀၀၀၀ထိ ဈေးပေးဝယ်နေရကြောင်း ဒေသခံတစ်ဦးထံမှ သိရသည်။
” ဈေးတက်တာက အားလုံးတက်တယ်။ တစ်ရက်နှစ်ရက် အတွင်းမှာပဲ ကြက်ဥတစ်လုံးကို ၁၅၀၀၊ ခရမ်းချဉ်သီးတစ်ပိသာ ၂၀၀၀၀ကျပ်အထိ ဈေးတက်သွားပြီ။ ထောင်ဂဏန်းကနေ သောင်းဂဏန်းထိ ဈေးတက်ကုန်ပြီ ” ဟု ၎င်းကဆိုသည်။
လက်ရှိ ပူတာအိုမြို့တွင် ဒေသထွက်အသီးအနှံများနှင့် လေကြောင်းပိုင်းဖြင့် သယ်ဆောင်ရသည့် ကုန်ပစ္စည်းများသာ အသုံးပြု စားသုံးနေရပြီး၊ ဈေးနှုန်းများကို အဆမတန် ပေးဝယ်နေရကြောင်း သိရသည်။
ကားလမ်းပိုင်းကို ပိတ်ထားသည့်အတွက် စားသုံးကုန်ပစ္စည်းများအပြင် ဆောက်လုပ်ရေးပစ္စည်းများလည်း ပြတ်လပ်မှုရှိလာသည့်အတွက် လုပ်ငန်းရှင်များ ရပ်နားထားကြောင်း သိရကာ ဒေသခံပြည်သူများ အလုပ်လက်မဲ့ဖြစ်လာခြင်း၊ သွားရေးလာရေး ခက်ခဲမှုများ ရှိလာသည့်အတွက် လမ်းပိုင်းကို ပြန်လည်ဖွင့်ပေးနိုင်စေရန် ပြည်သူများက လိုလားနေကြသည်။
သံလွင်