မုယင္းစပါးစိုက္ လယ္ေျမ ဧက ၇၀ သဲဖုံးလႊမ္း၍ ေဒသခံလယ္သမားမ်ား အခက္ၾကံဳေတြ႕ေန

ဗန်းမော်မြို့နယ်၊ သဖန်းပင်ကျေးရွာအပိုင် ဧရာဝတီမြစ်အရှေ့ဘက်ကမ်းရှိ မုယင်းစပါးစိုက် လယ်မြေ ဧက ၇၀ သဲဖုံးလွှမ်းခြင်းခံရခြင်းကြောင့် ဒေသခံလယ်သမားများ အခက်ကြုံတွေ့နေရကြောင်း သိရသည်။

လွန်ခဲ့သော ၉ နှစ် ခန့်ကတည်းက ယနေ့ထိ ဧရာဝတီမြစ်အတွင်း ရွှေကျင်လုပ်ငန်းများ လုပ်ကိုင်ခဲ့မှုကြောင့် ကချင်ပြည်နယ် ဗန်းမော်မြို့နယ် သဖန်းပင်ကျေးရွာရှိ မုယင်းစပါးစိုက် လယ်ဧက ၇၀ ခန့်မှာ သဲများဖုံး လွှမ်းမှု ဒဏ်ခံခဲ့ရပြီး ၎င်းစိုက်ပျိုးမြေများ ယနေ့တိုင်ပျက်စီးပြီး စိုက်ပျိုး၍ မရသောကြောင့် ဒေသခံလယ်သမားများ အခက်တွေ့နေရကြောင်း ကျေးရွာအုပ်ချုပ်ရေးမှူးက ပြောသည်။

“၂၀၁၀ ခုနှစ်လောက်ကနေ  မြစ်အတွင်းမှာ ရွှေကျင်လုပ်ငန်းတွေ လုပ်ကိုင်ခဲ့တဲ့အတွက် ရွာအနီးက မုယင်းစပါးစိုက် လယ်ဧက ၇၀ ခန့် သဲများ ဖုံးလွှမ်းခြင်းခံရလို့ လယ်မြေတွေပျက်စီးခဲ့ပါတယ်။ ဒီနေ့ထိ သဲတွေဖုံးလွှမ်းနေလို့ စိုက်ပျိုးနိုင်ခြင်းမရှိပဲ ဒေသခံတွေ အခက်အခဲဖြစ်နေတယ်”ဟု သဖန်းပင်ကျေးရွာ အုပ်ချုပ်ရေးမှူး ဦးသန်းပို က ပြောသည်။

ဗန်မော်မြို့နယ်ရှိ သဖန်းပင်ကျေးရွာနှင့် ငှက်ပျော်တောကျေးရွာများမှာ ဧရာဝတီမြစ်အရှေ့ဘက်ကမ်းတွင် တည်ရှိပြီး မြစ်ရေကျဆင်း၍ ရေနည်းပါးသည့်အခါများတွင် မုယင်းစပါးစိုက်ပျိုးကြလေ့ရှိကြောင်း ဒေသခံများ ထံမှ သိရသည်။

“သဲဖုံးပြီးကတည်းက စပါးလည်းစိုက်မရဘူး၊ မြေထောက်ပဲလည်း စိုက်မရတော့ဘူး ဘာအပင်စိုက်စိုက်ကို မပေါက်ဘူး မြက်ပင်ပဲပေါက်တယ်”ဟု သဖန်းပင်ကျေးရွာမှ လယ်သမားတစ်ဦးက ပြောသည်။

ယင်းသို့ သဲဖုံးလွှမ်းမှုများကြောင့် စိုက်ပျိုးမြေအခက်အခဲဖြစ်ပေါ်နေမှုအပေါ် တာဝန်ရှိသူများအနေဖြင့် လာရောက် ကွင်းဆင်းလေ့လာပြီး အခြားမြေနေရာ ပံပိုးကူညီရန် ဒေသခံများမှ လိုလားလျက်ရှိကြောင်း သိရသည်။

ဗန်မော်သုခမိန်