အေးစေတီရပ်ကွက်တွင် ကားလမ်းဘေးလမ်းလျှောက်နေသည့် အသက် ၇၀ အရွယ်အဖိုးအိုတစ်ယောက်ကို ကားဖြင့်ဝင်တိုက်ပြီး မောင်းပြေး
EPN
မြစ်ကြီးနား၊နိုဝင်ဘာ ၂၈
မြစ်ကြီးနားမြို့ အေးစေတီရပ်ကွက်ရှိ အေးစေတီတရုတ်ခေါက်ဆွဲတန်းရှေ့တွင် လမ်းလျှောက်နေသည့်အသက် ၇၀ နီးပါးအရွယ် အဖိုးအိုတစ်ယောက်အား ကားဖြင့်ဝင်တိုက်မိပြီးနောက် ကားသမားမှာ မောင်းပြေးသွားသည့်ဖြစ်စဉ်တစ်ခု ယမန်နေ့ ည ၈ နာရီခန့်က ဖြစ်ပွားခဲ့ကြောင်း ဧရာဝတီဂရုဏာလူမူကူညီရေးအသင်းထံမှ သိရသည်။
“အဲ့အဖိုးက ကားလမ်းဘေးမှာလမ်းလျှောက်နေတဲ့ချိန်ဘေးကနေဝင်တိုက်သွားတယ်လို့ပြောကြတယ်၊ကားကအိမ်စီးကားပဲ၊အဲ့ကားက မီးလည်းမပါဘူး၊မြို့ထဲဘက်ကနေမောင်းလာတာ၊အဖိုးကိုဝင်တိုက်ရောမရပ်ပဲရွှေညောင်ပင်ဘက်ကိုမောင်းပြေးသွားတယ်၊အဖိုးကအသက် ၇၀ နီးပါးရှိတယ်၊အေးစေတီရပ်ကွက်မှာနေတဲ့သူပဲ၊အသက်အန္တရာယ်တော့မစိုးရိမ်ရပေမဲ့ခြေ ထောက်ကလမ်းလျှောက်မရဘူး၊ဒူးကောင်းတွေပြဲသွားတယ်၊ညတုန်းကဆေးရုံပို့ဆေးကုသပေးတဲ့ထိတော့ကျွန်တော်တို့အဖွဲ့ကကူညီပေးခဲ့တယ်”ဟု ဧရာဝတီဂရုဏာလူမူကူညီရေးအသင်းမှ တာဝန်ရှိသူတစ်ဦးကပြောသည်။
အဆိုပါ ကားဖြင့်ဝင်တိုက်ပြီးမောင်းပြေးသည့်ကားသမားမှာ မည်သူမည်ဝါဖြစ်ကြောင်း မသိရပဲ ကားတိုက်ခံရသည့်အဖိုးအိုမှာ အေးစေတီရပ်ကွက်တွင်နေထိုင်သူတစ်ဦးဖြစ်ကြောင်းသိရပြီး လက်ရှိတွင်၎င်းကားတိုက်ခံရသည့် ဒဏ်ရာများဖြင့် ဆေးကုသခံယူနေကြောင်း သိရသည်။
လင်းယုန်