ပမ္မတီး မြစ်ဆိပ်တွင် ကျောင်းသားတစ်ဦး သူငယ်ချင်းများနှင့်အတူ ရေဆင်းကူးရာမှ ရေနှစ်ပျောက်ဆုံးနေ
EPN
မြစ်ကြီးနား၊ ဩဂုတ် ၂၅
မြစ်ကြီးနားမြို့၊ ပမ္မတီး မြစ်ဆိပ်တွင် ကျောင်းသားတစ်ဦး သူငယ်ချင်းများနှင့်အတူ ရေဆင်းကူးရာမှ ရေနစ်ပျောက်ဆုံးနေသည့် ဖြစ်စဉ်တစ်ခု ယမန်နေ့ နေ့လည်ပိုင်းက ဖြစ်ပွားခဲ့ကြောင်း မျိုးဆက်သစ် လူမှုကယ်ဆယ်ရေး အသင်းထံမှ သိရသည်။
ဖြစ်စဉ်မှာ ပမ္မတီး မြစ်ဆိပ်စက်လှေဂိတ်နားတွင် သူငယ်ချင်း ၅ ယောက်နှင့်အတူ ရေဆင်းကူးခဲ့ကြပြီး၊ အားလုံး ရေထဲမျောသွားခဲ့ချိန် သူငယ်ချင်း ၅ ယောက်အား ဘေးနားရှိ လူတွေမှ ကယ်ဆယ်နိုင်ခဲ့ကြသော်လည်း အဆိုပါကျောင်းသားတစ်ဦးမှာ ရှာဖွေတွေ့ရှိခြင်းမရှိပဲ ပျောက်ဆုံးနေကြောင်း မျိူးဆက်သစ်လူမှုကူညီရေးအသင်းမှ တာဝန်ရှိသူတစ်ဦးက ပြောသည်။
” သူတို့အားလုံးပေါင်း ၆ ယောက်လို့ပြောတယ်။ ရေဆင်းကူးရင်းကနေ ရေကကြီး တော့ အကုန်ရေစီးနဲ့ မျောသွားကြတာ။ကျန်တဲ့၅ယောက်က ဘေးနားကလူတွေကယ်လိုက်ကြပေမယ့် အဲ့ကျောင်းသားတစ်ယောက်တော့ ပျောက်နေတယ်။ ကျွန်တော်တို့လည်း သတင်းကြားတာနဲ့ သွားရှာခဲ့ပေမယ့် ရေကြီးတော့ ရှာရတာမလွယ်ဘူး။ ဒီနေ့တော့ မီးသတ်အဖွဲ့တွေနဲ့ ဝိုင်းဝန်းပြီး သွားရှာဖို့ရှိတယ် ” ဟု ၎င်းကဆိုသည်။
အဆိုပါ ရေနစ်ပျောက်ဆုံးသူ၏ နာမည်အသက်အပြည့်အစုံအား မသိရှိရသေးကြောင်း သိရပြီး၊ ယနေ့တွင်လည်း ရေနစ်ပျောက်ဆုံးနေသည့် ကျောင်းသားအား မီးသတ်အဖွဲ့များ၊ လူမှုကယ်ဆယ်ရေးအဖွဲ့များနှင့်အတူ ဆက်လက်ရှာဖွေသွားမည်ဖြစ်ကြောင်း သိရသည်။
သံလွင်