မြစ်ကြီးနားမြို့ လူထုအခြေပြု ဗဟိုဌာနတွင်လက်ဆောင်ပန်းခြင်း အလှဆင်နည်း သင်တန်းကို အခမဲ့ ဖွင့်လှစ်ပေးသွားမည်
EPN
မြစ်ကြီးနား၊ မတ် ၄ (၂၀၂၄)
မြစ်ကြီးနားမြို့၊ မြို့မရပ်ကွက်ရှိ လူထုအခြေပြု ဗဟိုဌာန (Community Centre) တွင် လက်ဆောင်ပန်းခြင်း အလှဆင်နည်း သင်တန်းကို မတ်လ ၈ ရက်နေ့နှင့် ၉ ရက်နေ့ နှစ်ရက်တာ အခမဲ့ ဖွင့်လှစ်ပေးသွားမည်ဖြစ်ကြောင်း သိရသည်။
ယင်းကဲ့သို့ သင်တန်းဖွင့်လှစ်ပေးရခြင်းမှာ ဒေသခံပြည်သူများ အလုပ်ကိုင်၊ အခွင့်လမ်းရရှိစေရန် ရည် ရွယ်ပြီး လူမှုဝန်ထမ်းဦးဌာန တာဝန်ခံများ၊ တိုင်းရင်းသားရေးရာ ဝန်ကြီးဌာန အဖွဲ့များ၊ ကချင်ပြည်နယ် စာကြည့်တိုက်ဖောင်ဒေးရှင်းများနှင့် စေတနာရှင် အတတ်ပညာရှင်များ ပူးပေါင်းပါဝင်ပြီး သင်တန်းကို အခမဲ့ ဖွင့်လှစ်ပေးရခြင်းဖြစ်ကြောင်း လူထုအခြေပြုဗဟိုဌာနမှ တာဝန်ရှိသူတစ်ဦးထံမှ သိရသည်။
“ အခုလို သင်တန်းဖွင့်လှစ်ပေးရတာကတော့ ဒေသခံ ပြည်သူတွေ အလုပ်အကိုင်၊ အခွင့်အလမ်းများ ရရှိစေ ရန်ဆိုပြီး ဖွင့်လှစ်ပေးရတာပါ။ အခုချိန်က ပွဲတွေမှာ အသုံးလိုတာဆိုတော့ တတ်ထားရင် ပိုကောင်းတာပေါ့။ ဘုရား ကျောင်းတွေ၊ အခမ်းအနား ပွဲတွေမှာ အသင်းအဖွဲ့တွေနဲ့ လုပ်နိုင်အောင်ဆိုပြီး သင်တန်းကြေးလည်း အခမဲ့ပဲ။ ဒါကြောင့် တက်ချင်တဲ့သူတိုင်း လာတက်လို့ရပါတယ်” ဟု ၎င်းကဆိုသည်။
အဆိုပါ သင်တန်းတွင် မွေးနေ့/အမှတ်တရနေ့များအတွက် လက်ဆောင် ပန်းစည်း ပြုလုပ်နည်း၊ သတို့သမီး လက်ကိုင်ပန်း၊ ရင်ကပ်ပန်းများ ပြုလုပ်နည်း၊ ပွဲများဉ အခမ်းအနားများတွင် ပန်းအလှပြင်နည်း၊ ပန်းများ၏ အခြေခံသဘောတရားများ၊ ထိန်းသိမ်းနည်း၊ ပန်းထိုးသည့် အခြေခံ အကြောင်းအရာများအပြင် အဆင့်မြင့် ပန်းအလှဆင်နည်းများတို့ကို စာတွေ့လက်တွေ့ဖြင့် သင်ကြားပေးသွားမည်ဖြစ်ပြီး၊ အသက်အရွယ်အားဖြင့် ကန့်သတ်မှုမရှိသော်လည်း လူဦးရေအားဖြင့် (၃၀)ဦးအထိ ကန့်သတ်ထားသည့်အတွက် ၀၉- ၂၆၆၅၉၄၉၅၆ သို့ဆက်သွယ်ကာ လူထုအခြေပြုဗဟိုဌာနသို့ လာရောက် သင်ကြားနိုင်ကြောင်း သိရသည်။
မြစ်ကြီးနားမြို့ လူထုအခြေပြု ဗဟိုဌာန (Community Centre) အနေဖြင့် ယခုနှစ် (၂၀၂၄)ခုနှစ်တွင် အခမဲ့သင်တန်း (၆)ကြိမ်မြောက် ဖွင့်လှစ်ခဲ့ပြီး၊ အဆိုပါ ပန်းအလှဆင်နည်းသင်တန်း ပြီးဆုံးပါက အင်္ဂလိပ်စာ (Grammar)သင်တန်းနှင့် ကွန်ပြူတာသင်တန်းကိုလည်း အခမဲ့ ဖွင့်လှစ်ပေးသွားမည်ဖြစ်ကြောင်း သိရသည်။
သံလွင်