NUG နဲ့ ထိတွေ့ဆက်ဆံမှုအပေါ် လက်တုံ့ပြန်တဲ့အနေနဲ့ တီမောသံအမတ်ကို မြန်မာနိုင်ငံအတွင်းက နှင်ထုတ်
EPN
မြစ်ကြီးနား၊ သြဂုတ် ၂၈
NUG နဲ့ ထိတွေ့ဆက်ဆံမှုတွေပြုလုပ်ခဲ့တဲ့ တီမောအစိုးရကို လက်တုံ့ပြန်တဲ့အနေနဲ့ တီမောလက်စ်တေသံရုံး သံရုံးယာယီတာဝန်ခံကို မြန်မာနိုင်ငံအတွင်းကနေ စက်တင်ဘာ ၁ ရက်နေ့မတိုင်မီ ထွက်ခွာသွားဖို့ အမိန့်ပေးထားတယ်လို့ သိရပါတယ်။
မြန်မာအစိုးရက တီမောအစိုးရကို အကြိမ်ကြိမ်သတိပေးထားတဲ့ကြားက မြန်မာ−တီမော နှစ်နိုင်ငံဆက်ဆံရေးကို ထိခိုက်စေတဲ့ အကြမ်းဖက်အားပေး NUG နဲ့ထိတွေ့ဆက်ဆံမှုတွေပြုလုပ်ခဲ့တာကို မြန်မာနိုင်ငံခြားရေးဝန်ကြီးဌာနက တွေ့ရှိခဲ့တယ်လို့ ဆိုပါတယ်။
ပြည်ထောင်စုလွှတ်တော် ကိုယ်စားပြု ကော်မတီ (CRPH) ၊ အမျိုးသားညီညွတ်ရေးအစိုးရ (NUG) ၊ ပြည်သူ့ကာကွယ်ရေးအဖွဲ့ (PDF) တို့ကို အကြမ်းဖက်အုပ်စုတွေအဖြစ် ၂၀၂၁ ခုနှစ် မေလ ၈ ရက်နေ့က တရားဝင်ထုတ်ပြန်ခဲ့ပြီးကြောင်း တီမောနိုင်ငံကို နိုင်ငံခြားရေးဝန်ကြီးဌာနက အသိပေးထားတယ်လို့ ဆိုပါတယ်။
ဒါပေမယ့် တီမောအစိုးရက အသိပေးချက်တွေကို လျစ်လျူရှုပြီး နှစ်နိုင်ငံ ဆက်ဆံရေးကို ထိခိုက်စေတဲ့ NUG နဲ့ ထိတွေ့ဆက်ဆံမှုတွေ ပြုလုပ်ခဲ့ရုံသာမက အကြမ်းဖက်ဆောင်ရွက်မှုတွေပိုမိုလုပ်ဆောင်ဖို့ အားပေးနေတဲ့အတွက် သံတမန်ဆက်ဆံရေးဆိုင်ရာ ဗီယင်နာကွန်ဗင်းရှင်းနဲ့ မကိုက်ညီတဲ့ တီမောအစိုးရရဲ့ လုပ်ဆောင်ချက်တွေကို ပြင်းထန်စွာကန့်ကွက်ကြောင်း နိုင်ငံခြားရေးဝန်ကြီးဌာနက အသိပေးထားပါတယ်။
ကေက