ဧရာဝတီတိုင်းဒေသကြီးတွင် စပါးရိတ်ခြွေခ နှုန်းထားများ ဈေးမြင့်တက်မှုကြောင့် တောင်သူများ အခက်တွေ့
EPN
ဧရာဝတီ၊ ဒီဇင်ဘာ ၁၇
ဧရာဝတီတိုင်းဒေသကြီးတွင် ယခုနှစ် မိုးစပါးများရိတ်သိမ်း နေသည့် ဒီဇင်ဘာလတွင် စပါးရိတ်ခြွေခနှုန်းထားများ အဆမတန် ဈေးမြင့်တက်လာခြင်းကြောင့် တောင်သူများ အခက်အခဲ ဖြစ်ပေါ်နေကြောင်း ဒေသခံ တောင်သူများထံမှသိရသည်။
ပြီးခဲ့သည့် ၂၀၂၀-၂၀၂၁ ခုနှစ်က တစ်ဧကလျှင် စပါးရိတ်ခြွေခအနေဖြင့် ငွေကျပ် လေးသောင်းခန့်သာရှိခဲ့ပြီး ယခုနှစ် တွင် စပါးတစ်ဧကလျှင် ရိတ်ခြွေခအနေဖြင့် ငွေကျပ် တစ်သိန်းမှ တစ်သိန်းခွဲအထိ ဈေးတက်လာကြောင်း မော်လမြိုင်ကျွန်းမြို့နယ်မှ တောင်သူတစ်ဦးကပြောသည်။
” စပါး တစ်ဧက ရိတ်သိမ်းခက လောလောဆယ် တစ်သိန်းပေါက်နေတယ်၊ ထပ်တက်လာ ဖို့ပဲရှိတယ်၊ ဆီဈေးကျရင်တော့ သူကျပေးမယ်၊ ဆီဈေးတွေ တက်နေတော့သူတို့လည်း လျော့ပေးလို့ မရဘူးလို့ ပြောတယ်၊ အခု စက်သုံးဆီစျေးကတက်လာတယ်၊ တစ်ပေပါကို ၁၁ သိန်းခွဲ ကျော်ဈေး အထိပြန်တက်လာတယ်၊ အစစ အရာရာဈေး ကလည်းတက်နေတာ၊ ရိတ်သိမ်းချိန်လည်းတက် ၊စိုက်ပျိုးချိန်လည်းတက် ဆိုတော့ လယ်လုပ်ရတာ စိတ်ကုန်လာတယ်၊ ဈေးတောင်းလျော့တာမရ ၊ အချိန်မီမရိတ်နိုင်ရင် ကြွေကုန်မှာ၊ အချိန်အခါမဟုတ်မိုးမိမှာ၊ ကြွက်ကိုက်မှာ၊နောက်သီးနှံ ပြန်စိုက်ရင် နောက်ကျမှာစိုးတော့ တော်တော်အခက်အခဲရှိတယ် ” ၎င်းကပြောသည်။
တောင်သူများမှာ ယခုနှစ် မိုးစပါးစိုက်ပျိုးသည့်အချိန် ကစတင်၍ စက်သုံးဆီဈေးနှုန်းကြီးမြင့်မှု ၊ဓာတ်မြေဩဇာဈေးမြင့်တက်မှုနှင့် အခြားလယ်ယာသုံးပစ္စည်းများ ဈေးနှုန်းကြီးမြင့်မှုဒဏ်ကို ခံခဲ့ရပြီး စပါးထွက်ရှိလာသည့် လက်ရှိအချိန်တွင်လည်း စပါးရိတ်ခြွေ စားရိတ်များ မြင့်တက်လာမှုဒဏ်ကို ခံနေရကြောင်း ဘိုကလေးမြို့နယ်မှ တောင်သူတစ်ဦးကပြောသည်။
” အခု လယ်သမားတွေက ဘယ်လိုမှ အဆင်မပြေကြဘူး၊ အဆင်မပြေလဲလုပ်ရမှာပဲ၊ တောင်သူလယ်သမားဆိုတာ လယ်ပဲလုပ်စရာရှိတယ်လေ၊ စပါးစိုက်တုန်းကလည်း ဒီဇယ်တွေ ဆီတွေဈေးတက်လည်းလုပ်ရတာပဲ၊ လုပ်ရကိုင်ရတာလည်း ရတာနဲ့ ရင်းနှီးရတာနဲ့ မကိုက်ဘူး၊ ကိုယ့်အတွက်ကို မကျန်ဘူး၊ တစ်ရာသီနဲ့ တစ်ရာသီ ပိုပို ကြပ်လာတယ် ” ဟု ၎င်းက ထပ်မံပြောသည်။
ဧရာဝတီတိုင်းဒေသကြီးတွင် ယခုနှစ် မိုးစပါးစိုက်ပျိုးသည့် အချိန်က လုံခြုံရေးအခြေအနေများကြောင့် လယ်ကွင်း ထွက်အလုပ် မလုပ်နိုင်ခဲ့ခြင်း၊ စပါး စတင်စိုက်ပျိုးသည့်အချိန် ဓာတ်မြေဩဇာများကို မြေခံအဖြစ်အသုံးမပြုနိုင်ခြင်း၊ အပင်များ သန်မာလာသည့်အရွယ်တွင် ဓာတ်မြေဩဇာနှင့် အပင်အားဆေးများ အပြည့်အဝ မသုံးစွဲခဲ့ရခြင်းကြောင့် ယခုနှစ် စပါးအထွက်လျော့ကျနေကြောင်း သိရသည်။
သူရ