ဖားကန့်မြို့နယ်တွင် ၆၆ ကေဗွီဓာတ်အားလိုင်း လျှပ်စစ်မီး ပြန်လည်ရရှိ
EPN
မြစ်ကြီးနား ၊ မတ် ၁၁ (၂၀၂၄)
ကချင်ပြည်နယ်၊ ဖားကန့်မြို့နယ်တွင် မတ်လ ၁၀ ရက်နေ့၊ ညနေ ၃ နာရီခန့်က ၆၆ ကေဗွီ ဓာတ်အားလိုင်း ကောင်းမွန်ပြီ ဖြစ်၍ လျှပ်စစ်မီး ပြန်လည်ရရှိနေပြီဖြစ်ကြောင်း သိရသည်။
ဖေဖော်ဝါရီလ ၁၇ ရက်နေ့က စတင်ကာ ပြတ်တောက်နေသည့် မိုးကောင်း – ဖားကန့် ဓာတ်အားလိုင်းကို ပြုပြင်ရေးများဆောင်ရွက်လျက်ရှိရာ ယနေ့မှာတော့ လျှပ်စစ်မီး ပြန်လည်ရရှိပြီဖြစ်ကြောင်း ဖားကန့်လျှပ်စစ်အင်ဂျင်နီယာရုံးမှ တာဝန်ရှိသူတစ်ဦးက ပြောသည်။
” မတ်လ ပထမ အပတ်လောက်ကစပြီး ပြုပြင်ရေးတွေ အားလုံးဆောင်ရွက် ပြီးစီးခဲ့တယ်။ ဒါပေမယ့် ဖားကန့်မြို့နယ်အတွင်းက ထရန်စဖော်မာတွေမှာ ဓာတ်ကြိုး ခိုးခံရတာတွေရှိတော့ ဒါတွေ အရင်တပ်ဆင်ပြီးမှသာ မီးပေးနိုင်မှာ ဖြစ်တယ်။ ဒီနေ့မှာတော့ လျှပ်စစ်မီးပြန်လည် ရရှိခဲ့တာဖြစ်တယ် ” ဟု ၎င်းကပြောသည်။
ဖေဖော်ဝါရီလ (၄) ရက်နေ့၊ နံနက် (၁၀)နာရီခန့်က နန့်တိမ်းဂိတ်အနီး လက်နက်ကြီး ပစ်ခတ်မှုများ ဖြစ်ပွားခဲ့ကာ ယင်းလက်နက်ကြီး ထိမှန်မှုကြောင့် မိုးကောင်း – ဖားကန့် ဓာတ်အားလိုင်းဖြစ်သည့် ၆၆ ကေဗွီ ဓာတ်အားလိုင်း ပျက်သွားရခြင်းဖြစ်ပြီး၊ လက်ရှိတွင် ရာခိုင်နှုန်းပြည့် ပြင်ဆင်ထားပြီးဖြစ်ကြောင်း သိရသည်။
လျှပ်စစ်ဓါတ်အား ပြတ်တောက်သွားသည်မှာ ၁လကျော် ကြာပြီဖြစ်၍ လျှပ်စစ်ဓာတ်အား (မီး)လာသည်နှင့်တပြိုက်နက်တည်း ဓါတ်အားအပြည့်အဝသုံးစွဲခြင်းကို ရှောင်ရှားကြရန်နှင့် ထူးခြားဖြစ်စဥ် တစ်စုံတစ်ခု ဖြစ်ပေါ်ခဲ့ပါက သက်ဆိုင်ရာသို့ ဆက်သွယ်ရန် ဖားကန့်မြို့နယ် လျှပ်စစ်အင်ဂျင်နီယာရုံးမှ သတိပေး ပြောကြားထားသည့်။
ဗညားနွဲ့