ဖားကန့်မြို့တွင် မြန်မာ့စီးပွားရေး ဘဏ်အနီးပေါက်ကွဲမှုဖြစ်ပွားကာ လုံခြုံရေးစောင့်နေသည့် ရဲတပ်ဖွဲ့ဝင် (၃)ဦး ထိခိုက်ဒဏ်ရာရရှိ
EPN
မြစ်ကြီးနား၊ နိုဝင်ဘာလ ၅
ကချင်ပြည်နယ် ဖားကန့်မြို့နယ်တွင် ယမန်နေ့ နိုဝင်ဘာလ ၄ ရက်နေ့ ညနေ (၅)နာရီခွဲခန့်က မှော်ဝမ်းရပ်ကွက် ရှိ မြန်မာ့စီးပွားရေးဘဏ်အနီး ပေါက်ကွဲမှုဖြစ်ပွားခဲ့ကာ ဘဏ်လုံခြုံရေးစောင့်နေသည့် ရဲတပ်ဖွဲ့ဝင် (၃)ဦး ထိခိုက်ဒဏ်ရာရရှိခဲ့ကြောင်းသိရသည်။
ယင်းပေါက်ကွဲမှုဖြစ်စဉ်ကြောင့် မြန်မာ့စီးပွားရေးဘဏ်လုံခြုံရေးစောင့်နေသည့် ရဲတပ်ဖွဲ့ဝင် (၃)ဦးအနက် (၂)ဦးမှာစိုးရိမ်ရဒဏ်ရာများဖြင့် ဖားကန်ပြည်သူဆေးရုံကြီးသို့ ပို့ဆောင်ထားကြောင်း အနီးအနားရှိ ဒေသခံတစ်ဦးကပြောသည်။
“ ညနေ (၅)နာရီလောက် ဖြစ်သွားတာ ၊ ထောင်မိုင်းပဲလို့သုံးသပ်ရမယ်၊ ပေါက်ကွဲမှုက အတော်လေးပြင်းထန်ခဲ့တယ်၊ လုံခြုံရေးယူနေတဲ့ ရဲ(၃)ဦးကတော့ ပေါက်ကွဲမှုကြောင်းမြေပေါ်လဲကျသွားတယ်၊ (၂)ယောက်ကအတော်လေး ထိသွားတယ်၊ ချက်ချင်းပဲ သူတို့ကို ဖားကန်ဆေးရုံကိုပို့လိုက်တယ်လို့သိရတယ်”ဟု ၎င်းကပြောသည်။
ပေါက်ကွဲမှုဖြစ်ပွားပြီးနောက် ည(၈)နာရီခန်တွင် ဖားကန့်မြို့နေရာအနှံ သေနတ်သံများကြားရကြောင်း တိုက်ပွဲဖြစ်သည့်ပုံစံမဟုတ်ကြောင်း ဖားကန့်မြို့ လုံးခင်းကျေးရွာနေ ဒေသခံတစ်ဦးကပြောသည်။
“ ည (၈)နာရီလောက်စကြားရတယ်၊ ဆက်တိုက်ပဲ၊ ဆိုင်းတောင် ဇွပ်ရာ လုံးခင် အဲ့ဘက်တွေမှာ သေနတ်သံတွေကြားရတယ်၊ တိုက်ပွဲလိုတော့ အပြန်အလှန်ပစ်တယ်လို့တော့မကြားရဘူး၊ သေနတ်သံကြားရတော့ ဖားကန့်က ဘယ်သူမှ အပြင်မထွက်ရဲဘဲ အိမ်တွင်းမှာပဲ တံခါးပိတ်ပြီးနေကြတယ်၊” ဟု ၎င်းကပြောသည်။
အလားတူ ညပိုင်းတွင် ဖားကန့်မြို့ ရခိုင်ကုန်း၊ ဗျူဟာကုန်း၊ ဆန်းခါထောင် စသည့် တပ်မတော်စခန်းများမှ လက်နက်ကြီး လက်နက်ငယ်များဖြင့် ပစ်ခတ်မှုများလည်းရှိခဲ့ကြောင်းသိရသည်။
ပန်ပန်