ကားနှစ်စီးတိုက်မိရာမှ Light Truck ကားပေါ် လိုက်ပါလာသူ တစ်ဦးသေဆုံး
EPN
ရန်ကုန်၊ မတ် ၃၀ (၂၀၂၄)
ရန်ကုန်တိုင်း၊ လှည်းကူးမြို့နယ်တွင် ယမန်နေ့ညပိုင်းက ကားနှစ်စီးတိုက်မိခဲ့ရာမှ Light Truck ကားပေါ်တွင် လိုက်ပါလာသူ တစ်ဦးသေဆုံးခဲ့မှု ဖြစ်ပွားခဲ့ကြောင်း မီးသတ်တပ်ဖွဲ့နှင့် လူမှုကူညီရေးအသင်းများထံမှ သိရသည်။
ယမန်နေ့၊ ည ၁၀ နာရီ ၅၈ မိနစ်ခန့်က လှည်းကူးမြို့နယ်၊ ရှမ်းတဲကြီးအထက်ကျေးရွာရှိ ရန်ကုန်-မန္တလေးသွား အမှတ် ၂ လမ်းလမ်းမကြီးပေါ် “ထက်ဧကရီ” စက်သုံးဆီအရောင်းဆိုင်အနီးတွင် Light Truck ကားနှင့် အခြားကားတစ်စီးတို့တိုက်မိခဲ့ကြောင်း သိရသည်။
ယင်းကဲ့သို့ တိုက်မိမှုကြောင့် Light Truck ကားမောင်းသူမှာ ထိခိုက်ဒဏ်ရာရရှိမှု မရှိခဲ့ဘဲ ကားပေါ်တွင်လိုက်ပါလာသည့် အမျိုးသားတစ်ဦးမှာ ခေါင်းခန်းအတွင်းညပ်၍ ထိခိုက်ဒဏ်ရာများရရှိကာ သေဆုံးသွားခဲ့သဖြင့် မီးသတ်တပ်ဖွဲ့ဝင်များနှင့် လူမှုကူညီရေး အသင်းဝင်များက သယ်ထုတ်ခဲ့ကြရာ ည ၁၁ နာရီခွဲခန့်၌ သယ်ထုတ်နိုင်ခဲ့ကြောင်း သိရသည်။
ယင်းနောက် သေဆုံးသူ၏ ရုပ်အလောင်းအား Medical လူမှုကူညီရေးအသင်းမှ ဒါးပိန်ပြည်သူ့ဆေးရုံသို့ ပို့ဆောင်ပေးခဲ့ကြောင်း သိရသည်။
ကျော်စိုးသူ