နန့်စီပွန် ကျောက်စိမ်းတူးဖော်ရေး စွန့်ပစ် မြေစာပုံပြိုကျ၊ ကျောက်ရှာနေတဲ့ အမျိုးသမီး နှစ်ဦးသေဆုံး
EPN
ခန္တီး၊ ဖေဖော်ဝါရီ ၁၈
စစ်ကိုင်းတိုင်း၊ ခန္တီးမြို့နယ်၊ နန့်စီပွန် ကျောက်စိမ်းတူးဖော်ရေး လုပ်ကွက်တစ်ခုမှာ ဖေဖော်ဝါရီလ ၁၇ ရက် ၊ မနေ့က နေ့ခင်းပိုင်းမှာ မြေစာပုံပြိုကျတဲ့အတွက် ကျောက်ရှာသူ လူ ၂ ယောက် မြေစာပိပြီး သေဆုံးခဲ့တယ်လို့ နယ်ခံ ပရဟိတအဖွဲ့တွေထံက သိရပါတယ်။
“မြေစာပုံပြိုကျတာက နေ့ခင်း ၁၂ နာရီဝန်းကျင်မှာပါ ၊ ဖြစ်တာက ရွှေပြည်သာကျေးရွာ၊ ညောင်တပင် စွန့်ပစ်မြေစာပုံ ပြိုကျတာ၊ ရေမဆေးကျောက်ရှာနေတဲ့ အမျိုးသမီး ၂ ယောက် မြေစာပိပြီး သေဆုံးခဲ့တာ ” လို့ နယ်ခံ လူမှုကူညီရေး စေတနာ့ ဝန်ထမ်းတစ်ယောက်က ပြောပါတယ်။
သေဆုံးသူတွေမှာ ခန္တီးခရိုင် ရဲတပ်ဖွဲ့ရုံးနဲ့ နီးစပ်သူတစ်ယောက်က “သေဆုံးသူ ၂ ယောက်ဖြစ်တယ်၊ ဖောင်းပြင်မြို့၊ အင်ကြင်းမြိုင်ရပ်ကွက်နေ မခင်ခင်မော် ဆိုသူနဲ့ ခန္တီးမြို့နယ်၊ နောက်ပဲကျေးရွာနေ ဒေါ်အေးရီ တို့ ဖြစ်တယ် ” လို့ ဆိုပါတယ်။
အဆိုပါ ကျောက်မျက်တူးဖော်ရေး စွန့်ပစ်မြေစာပုံ ပြိုကျပြီး မြေစာတွေ ပိတ်မိနေတဲ့ သူနှစ်ယောက်ကို နယ်ခံ ပရဟိတသမားတွေက အမြန်ဆုံး ကယ်ဆယ်ကူညီပေးခဲ့ပြီး ခန္တီးပြည်သူ့ဆေးရုံကြီး ရင်ခွဲတိုက်သို့ ပို့ဆောင်ပေးခဲ့တယ်လို့ သိရပါတယ်။
သွန်းသွန်း