ဆင်ဘိုဒေသဘက်ရှိ လူငယ်(၅)ဦးကို KIA မှဖမ်းဆီးခေါ်ဆောင်
EPN
မြစ်ကြီးနား၊ ဖေဖော်ဝါရီလ ၁၃
ကချင်ပြည်နယ် ဆင်ဘိုဒေသ ညောင်ပင်သာသစ် ကျေးရွာရှိ အသက် (၂၀)နှစ်အထက် လူငယ် (၅)ဦးကို ဖေဖော်ဝါရီလ (၇)နေ့ ည(၈)နာရီခန့်က KIAမှနေအိမ်များတွင် လာရောက်ဖမ်းဆီး ခေါ်ဆောင်သွားခဲ့ကြောင်း ဒေသခံများထံမှ သိရသည်။
“ (၇)ရက်နေ့က သူတို့တွေရွာထဲဝင်ပြီး ဖမ်းဆီးတာတွေလုပ်ကြတယ်၊ အကြောင်းအရင်းမေးတော့ မူးယစ်ဆေးဝါးပြတ်အောင်လုပ်ပေးမယ် ဒါကြောင့်လာခေါ်တယ် အဲ့လိုပြောတယ်၊ အဖွားရဲ့သားက ဆေးလိပ်တောင်မသောက်ဘူး၊ ပြောလဲမရဘူး၊ ထဆိုပြီး လက်နှစ်ဖက်ကိုနောက်ကိုပစ်ပြီး ကြိုးနဲ့ချီသွားကြတယ်၊” ဟု ဒေသခံတစ်ဦးကပြောသည်။
အဆိုပါဖမ်းဆီးခံရသည့်လူငယ်(၅)ဦးမှာ အသက်(၂၀)နှစ်အထက်လူငယ်များဖြစ်ကာ အမျိုးသမီးငယ် တစ်ဦးလည်းပါဝင်နေပြီး ယနေ့အချိန်အထိ အဆက်အသွယ်ပြုလုပ်ခွင့်မရရှိသေးကြောင်းသိရသည်။
အဆိုပါ ဖမ်းဆီးခံရသည့်လူငယ်(၅)ဦးအပြင် အသက်(၄၅)နှစ်ခန့်ရှိသည့် လူကြီး(၂)ဦးကို လည်းဖမ်းဆီးခေါ်ဆောင်သွာခဲ့ပြီး ယင်းလူကြီး(၂)ဦးကိုတော့ပြန်လည်လွတ်ပေးခဲ့ကြောင်းသိရသည်။