ဆိုင်းတောင်ကျေးရွာတွင် မိုးသီးလုံးများ ကျရောက်မှုကြောင့် သွပ်များပျက်စီးကာ ဝယ်ယူ၍မရဖြစ်နေ
EPN
မြစ်ကြီးနား၊ မတ် ၂၇ (၂၀၂၄)
ကချင်ပြည်နယ်၊ ဖားကန့်မြို့နယ်၊ ဆိုင်းတောင်ကျေးရွာတွင် ယမန်နေ့ (မတ်လ ၂၆ ရက်နေ့) ည ၁၁ နာရီခန့်က ကြက်ဥအရွယ်အစားခန့်ရှိသည့် မိုးသီးလုံးများ ကျရောက်မှုကြောင့် နေအိမ်များ၊အဆောင်အအုံများရှိ သွပ်များ ပျက်စီးဆုံးရှုံးခဲ့ကြောင်း ဒေသခံများထံမှ သိရသည်။
ယင်းကဲ့သို့ သွပ်များ ပျက်စီးမှုများပြားသည့်အတွက် ဆိုင်းတောင်ကျေးရွာရှိ ကုန်မာဆိုင်များတွင် သွပ်များဝယ်လိုအားများခဲ့ကာ သွပ်များဝယ်ယူရန် ရှားပါးနေကြောင်း ဆိုင်းတောင်ကျေးရွာနေ ဒေသခံတစ်ဦးက ပြောသည်။
” မနေ့က မိုးသီးတွေက အကြီးကြီးတွေ ကျတာ။ မိုးသီးအရွယ်အစားက ကြက်ဥလုံးလောက်ရှိတယ်။ ကျတဲ့ ပမာဏကလဲ များတယ်။ လမ်းမှာဆို မိုးသီးတွေက အပုံလိုက် တွေ့ရတယ်။ အိမ်တွေဆိုလဲ သွပ်တွေပျက်စီး ပေါက်ပြဲတာတွေ ဖြစ်တယ်။ မနက်ကဆို အိမ်ကသွပ်လဲဖို့ သွားဝယ်တာ။ ဝယ်လို့မရတော့ဘူး။ ဆိုင်းတောင်ထဲမှာ သွပ်ရောင်းတဲ့ဆိုင်က သွပ်ကိုမရှိတော့တာ ” ဟု ၎င်းကပြောသည်။
အဆိုပါ မိုးသီးလုံးများ ကျရောက်မှုမှာ နာရီဝက်ခန့်ကြာ ဖြစ်ပွားခဲ့ပြီး၊ ယင်းကဲ့သို့ ကျရောက်မှုကြောင့် ဒေသခံများ၏ အိမ်ခေါင်မိုးများ ပျက်စီးသည့်အပြင် သီးနှံပင်များ ပျက်စီးမှုများ၊ ကားများ၊ ဆိုင်ကယ်များ မိုးသီးထိမှန် ပျက်စီးမှုများ ရှိခဲ့ကြောင်း သိရသည်။
ယင်းကဲ့သို့ သွပ်များဝယ်ယူရန် ရှားပါးသည့်အတွက် ဒေသခံများမှာ ဖားကန့်မြို့ပေါ်အထိ သွားရောက်ဝယ်ယူနေရပြီး၊ အချို့မှာ အခြားမြို့များမှ မှာယူနေရကြောင်း သိရသည်။
ဗညားနွဲ့