———————————————————————–
အမျိုးသမီးနဲ့ မိန်းကလေးငယ်တွေကို ထောက်ပံ့ပေးနေမှုမှတဆင့် ငြိမ်းချမ်းရေးလုပ်ငန်းစဉ်ကို အထောက်အကူပြုအထိ ဖြစ်လာဖို့ မျှော်လင့်တယ် ဟု အီးယူသံအမတ်ဆို
EPN
မြစ်ကြီးနား၊ စက်တင်ဘာ ၂၅
ဥရောပသမဂ္ဂအနေဖြင့် “အမျိုးသမီးနဲ့ မိန်းကလေးငယ်တွေအတွက် ထောက်ပံ့ပေးနေမှုမှ တဆင့် မြန်မာနိုင်ငံ၏ ငြိမ်းချမ်းရေး လုပ်ငန်းစဉ်များတွင် အထောက်အကူပြုနိုင်သည့် အထောက်အပံ့ကောင်း တစ်ခုဖြစ်လာဖို့ မျှော်လင့်ပါတယ်” ဟု အီးယူသံအမတ်ကြီး ခရစ်ရှန်ရှမစ်က ပြောသည်။
စက်တင်ဘာလ ၂၄ ရက်နေ့က မြစ်ကြီးနားမြို့၊ City Park Royal Hall မှာ ကျင်းပပြုလုပ်ခဲ့သည့် Woman and Girl Frist (WGF) Programme မှာ ဥရောပသမဂ္ဂသံအမတ်ကြီး ခရစ်ရှန်ရှမစ်က ယင်းကဲ့သို့ ပြောကြားခဲ့ခြင်း ဖြစ်သည်။
“အမျိုးသမီးနဲ့ မိန်းကလေးငယ်တွေ အနေနဲ့ ကျား၊ မ အခြေပြု အကြမ်းဖက်မှုနဲ့ လိင်ပိုင်းဆိုင်ရာ နောက်ယှက်မှုများ စတဲ့ နောက်ဆက်တွဲ ပြဿနာများကို ဖြေရှင်းနိုင်ရန်အတွက် လုံလောက်သော ထောက်ပံ့ငွေ ရရှိရေးအတွက် Woman and Girl Frist (WGF) Programme ကို ဆောင်ရွက်ရခြင်းဖြစ်ပါတယ်၊ အထူးသဖြင့် ကချင်ပြည်နယ်က IDP Camp မှာ နေရတဲ့ အမျိုးသမီးတွေဆိုရင် သူတို့မှာ လိုအပ်ချက်တွေ အများကြီး ရှိနေသေးတယ်၊ ဒီလိုပြဿနာတွေကို ကုစားပေးမှုကနေ ရေရှည်တည်တံ့ခိုင်မြဲတဲ့ ငြိမ်းချမ်းရေးဖြစ်စဉ်အတွက် အထောက်အကူပြုစေမယ့် လမ်းစတစ်ခုဖြစ်စေချင်တယ်၊ ဖြစ်လာဖို့လဲ မျှော်လင့်ပါတယ်” ဟု ၎င်းက ပြောသည်။
ကချင်ပြည်နယ် လူမှုဝန်ထမ်းဦးစီးဌာနမှ ညွှန်ကြားရေးမှူး ဒေါ်မြမာလာစိုး က လည်း မြန်မာနိုင်ငံသည် ဖွံ့ဖြိုးဆဲနိုင်ငံဖြစ်သည့်အလျောက် အမျိုးသမီးများနှင့် ကလေးငယ်များ စွမ်းဆောင်ရည် မြင့်မားရေးအတွက် NGO၊ INGO နှင့် EU တို့၏ ပံ့ပိုးကူညီမှုများစွာ လိုအပ်ကြောင်း ပြောဆိုခဲ့သည်။
UNFPA (ကုလသမဂ္ဂ လူဦးရေရန်ပုံငွေအဖွဲ့)အနေနှင့် WGF အစီအစဉ်ကို ၂၀၁၆ခုနှစ်မှ စတင်ကာ နော်ဝေး၊ ဆွိဒင်၊ သြစတေးလျနှင့် ဖင်လန်နိုင်ငံတို့၏ ထောက်ပံ့မှုများဖြင့် မြန်မာနိုင်ငံတွင် ကချင်ပြည်နယ်၊ ရခိုင်ပြည်နယ်နှင့် ရှမ်းပြည်နယ်တို့တွင် အဓိကထားဆောင်ရွက်ခဲ့ပြီး ယခုဆက်လက်ဆောင်ရွက်သွားမည့် ၃နှစ်အတွက် ယူရိုငွေငါးသန်း ကို ဥရောပသမဂ္ဂ ရန်ပုံငွေဖြင့် ဆောင်ရွက်သွားမည်ဖြစ်ကြောင်း သိရသည်။
မိုးဝေ