လက်နက်ကိုင်အဖွဲ့ဝင်များက ကျောက်တင်ရထားကို မိုင်းဖြင့် ဖောက်ခွဲတိုက်ခိုက်
EPN
သထုံ၊ မတ် ၁၈ (၂၀၂၄)
မွန်ပြည်နယ်၊ သထုံမြို့နယ်ရှိ ရန်ကုန်-မော်လမြိုင်သွား ရထားလမ်းပိုင်း၌ KNU၊ PDF ပူးပေါင်းအဖွဲ့မှ ကျောက်တင်ရထားတစ်စီးကို ယနေ့ (မတ် ၁၈ ရက်)၊ နံနက်ပိုင်းက မိုင်းဖြင့်ဖောက်ခွဲတိုက်ခိုက်ခဲ့ကြောင်း လုံခြုံရေးအဖွဲ့နှင့် နီးစပ်သူများထံမှ သိရသည်။
ယနေ့၊ နံနက် ၇ နာရီကျော်ခန့်က မြန်မာ့မီးရထားမှ ကျောက်တင်ရထားတစ်စီးသည် ရန်ကုန်-မော်လမြိုင်သွား ရထားလမ်းပိုင်းအတိုင်း ပေါင်မြို့နယ်၊ သဲဖြူကုန်းဘူတာမှ ပဲခူးမြို့နယ်၊ ကလိကျေးရွာဘူတာဘက်သို့ မောင်းနှင်လာခဲ့ကြောင်း သိရသည်။
ယင်းကဲ့သို့ မောင်းနှင်လာစဥ် သထုံမြိုနယ်၊ မိုးကောင်းကျေးရွာအထွက် ရထားလမ်းမိုင်တိုင်အမှတ် ၁၂၂/၃ နှင့် ၁၂၃/၁ ကြားရှိ ပေါင်းကူးတံတားအရောက် KNU ၊ PDF ပူးပေါင်းအဖွဲ့က မိုင်းဖြင့်ဖောက်ခွဲတိုက်ခိုက်ခဲ့ခြင်းဖြစ်ကြောင်း သိရသည်။
” ကျောက်တင်ရထားက တွဲဆိုင်း ၁၄ ဆိုင်းပါတယ်။ မိုင်းနဲ့ဖောက်ခွဲ တိုက်ခိုက်ခံရတာကြောင့် မှောက်သွားတဲ့ တွဲဆိုင်းတွေနဲ့ လမ်းချော်သွားတဲ့ တွဲဆိုင်းတွေရှိတယ်။ ထိခိုက်ဒဏ်ရာရတာ မရှိပါဘူး ” ဟု လုံခြုံရေးအဖွဲ့နှင့် နီးစပ်သူတစ်ဦးကပြောသည်။
မိုင်းပေါက်ကွဲမှုကြောင့် ပေါင်းကူးတံတား၏ တံတားဘယ်ဘက်အောက်ခံအုတ်ခုံဘောင်၊ ရထားလမ်းပေ (၂၀)ခန့် ပျက်စီးကာ ရထားသံလမ်းအ ဆက်များ ပြုတ်ထွက်ခဲ့သဖြင့် တွဲဆိုင်း (၂)တွဲ လမ်းချော်၍ (၅)တွဲတိမ်းမှောက်သွားခဲ့ကြောင်း သိရသည်။
ဖြစ်စဥ်အား လုံခြုံရေးအဖွဲ့ဝင်များက စစ်ဆေးမှုများ ပြုလုပ်၍ မြန်မာ့မီးရထားမှ ကျွမ်းကျင်ဝန်ထမ်းများက ပျက်စီးသွားသည့် နေရာများအား အမြန်ဆုံးပြန်လည်ပြင်ဆင်နိုင်ရန် ဆောင်ရွက်လျက်ရှိကြောင်း သိရသည်။
ကျော်စိုးသူ