ဆဒုံးမြို့ (၃၆)မိုင်အနီး တွဲကားတစ်စီးတိမ်းမှောက်ကာ ကားမောင်းသူ အမျိုးသားတစ်ဦး သေဆုံး
EPN
မြစ်ကြီးနာ၊ ဖေဖော်ဝါရီ ၁၇ (၂၀၂၄)
ကချင်ပြည်နယ်၊ ဆဒုံးမြို့ (၃၆) မိုင်အနီး ယမန်နေ့ ညနေ (၃)နာရီခန့် က ကားတာယာများ တင်ဆောင်လာသည့် တွဲကားတစ်စီး တိမ်းမှောက်ကာ ကားမောင်းသူ အမျိုးသားတစ်ဦး နေရာမှာပင်သေဆုံးသွားခဲ့ကြောင်း ဝိုင်းမော်မြို့အခြေစိုက် လူမှုကူညီရေးအသင်းများထံမှ သိရသည်။
ကံပိုက်တည်မှ ဆင်းလာသည့် ကားတာယာများ တင်ဆောင်လာသည့် တွဲကားသည် ဆဒုံမြို့မှ (၃၆)မိုင်အကွာတွင် အရှိန်မထိမ်းနိုင်ဘဲ လမ်းဘေးရှိမြေသားနံရံကို ဝင်တိုက်မိကာ တွဲကားတိမ်းမှောက်ခဲ့ရကြောင်း၊ ယင်းတွဲကားမောင်းနှင်သူမှာ နေရာမှာပင် သေဆုံးခဲ့ကြောင်း ဝိုင်းမော်မြို့အခြေစိုက် လူမှုကူညီရေးအသင်း တစ်ခုမှ တာဝန်ရှိသူတစ်ဦးက ပြောသည်။
” ဖြစ်စဉ်ကတော့ တွဲကားကြီးက အဆင်းအကွေ့မှာ အရှိန်များပြီး ဘေးကနံရံကိုဝင်တိုက်မိတာ။ ကားလဲမှောက်သွားတယ်။ ကားခေါင်းကကြေမွပြီး အထဲက ကားသမားလဲ ညပ်ပြီး သေဆုံးသွားတယ်။ ဘေးမှာပါလာတဲ့ သေဆုံးသူရဲ့ သားကလည်း ခြေထောက်ကျိုးသွားတယ်။ သေဆုံးသူကိုတော့ ဝိုင်းမော်ဆေးရုံကြီးကို ချက်ချင်းပဲ ပို့ထားလိုက်တယ် ” ဟု ၎င်းကပြောသည်။
သေဆုံးသူမှာ အသက် (၆၀)နှစ်အရွယ် မန္တလေးမြို့နေ ဦးသိုက်စိုး ဆိုသူဖြစ်ကာ တွဲကားယဉ် ဦးခေါင်းခန်းအတွင်း ကားဆီရာတိုင်နှင့် ညပ်မိကာ သေဆုံးခဲ့ခြင်းဖြစ်ကြောင်း သိရသည်။
၎င်းအပြင် သေဆုံးသူနှင့် အတူပါလာသည့် သားဖြစ်သူ အသက် (၂၄)နှစ်အရွယ် ကိုရဲနောင်ထက် ဆိုသူမှာလည်း ခြေထောက်ကျိုးဒဏ်ရာများ ရရှိခဲ့ပြီး မန္တလေးဆေးရုံကြီးသို့ ပို့ဆောင်ရန် စီစဉ်လျက်ရှိကြောင်း သိရသည်။
ဗညားနွဲ့