ကလေးမြို့တွင် အမျိုးသားတစ်ဦး၏ နေအိမ်အတွင်းမှ ငွေကျပ်သိန်းလေးရာ နီးပါး တန်ဖိုးရှိ မူးယစ်ဆေးဝါးများ ဖမ်းဆီးရမိ
EPN
ကလေး၊ အောက်တိုဘာ ၃ (၂၀၂၃)
ကလေးမြို့တွင် အမျိုးသားတစ်ဦး၏ နေအိမ်အတွင်းမှ ငွေကျပ်သိန်းလေးရာ နီးပါးတန်ဖိုးရှိ မူးယစ်ဆေးဝါးများကို ယမန်နေ့ နေ့လယ် ၂နာရီအချိန်ခန့်က ဖမ်းဆီးရမိခဲ့ကြောင်း သိရသည်။
ကလေးမြို့၊ စမ်းမြို့ရပ်ကွက်၊ ယုဇနလမ်းနေ ခင်မောင်သန်း (ခ) ဘာဘူ ၏ နေအိမ်အား ဝင်ရောက်ရှာဖွေရာ ၎င်းနှင့်အတူ ဇော်မင်းထွန်း (ခ) ဇော်ကြီး အား တွေ့ရှိပြီး နေအိမ်အတွင်းမှ ဘိန်းဖြူအလေးချိန် ၅၅၀ဂရမ် (ဒေသကာလပေါက်ဈေး တန်ဖိုးငွေကျပ်သိန်း ၃၃၀)၊ စိတ်ကြွရူးသွပ်ဆေးပြား၂၀၀ပြား (ဒေသကာလ ပေါက်ဈေး တန်ဖိုးငွေကျပ် ၅ သိန်း) နှင့် လက်ကိုင်ဖုန်း ၂ လုံးတို့ကို တွေ့ရှိ သိမ်းဆည်းရမိခဲ့သည်ဟု သိရသည်။
အဆိုပါ မူးယစ်ဆေးဝါးနှင့်ပတ်သက်၍ ခင်မောင်သန်း (ခ)ဘာဘူ (၄၂)နှစ် နှင့် ဇော်မင်းထွန်း (ခ) ဇော်ကြီး (၃၃)နှစ် တို့ကို ကလေးမြို့မရဲစခန်းတွင် မူးယစ်ဆေးဝါးနှင့် စိတ်ကို ပြောင်းလဲစေသော ဆေးဝါးများဆိုင်ရာ ဥပဒေအရ အမှုဖွင့် အရေးယူထားရှိပြီး ကွင်းဆက်များ ဆက်လက် ဖော်ထုတ် လျက်ရှိကြောင်း သိရသည်။
ထက်ထက်