အင်းတော်မြို့တွင် ရွှေဆိုင်တစ်ဆိုင်အား ဓါးမြတိုက်ခဲ့သူ ငါးဦး အနက် လေးဦး ဖမ်းဆီးရမိ
EPN
အင်းတော်၊ ဇန်နဝါရီ ၁၇
စစ်ကိုင်းတိုင်းဒေသကြီး ကသာခရိုင် အင်းတော်မြို့ အောင်ချမ်းသာရပ်ကွက် ရွှေဘို-မြစ်ကြီးနားဗျူဟာလမ်းမပေါ်ရှိ ရွှေဆိုင်တစ်ဆိုင်အား ဓါးပြတိုက်ခဲ့သူ (၅)ဦးအနက် (၄)ဦးကို ဖမ်းဆီးရမိခဲ့ကြောင်း အင်းတော်မြို့ မြို့မရဲစခန်း တာဝန်ရှိသူတစ်ဦးထံမှ သိရသည်။
ယင်းဓါးပြမှုမှာ အင်းတော်မြို့အောင် ချမ်းသာရပ်ကွက် “ဦးတင်အောင်”ရွှေဆိုင်တွင် လွန်ခဲ့သော ဇန်နဝါရီလ (၁၆ ) ရက်နေ့က ဖြစ်ပွားခဲ့သည့်အမှု ဖြစ်ပြီး ရွှေတစ်ပိဿာ ခြောက်ဆယ့်ငါးကျပ်သားခန့် ယူဆောင်သွားကြသူများ ဖြစ်သည်။
အင်းတော်မြို့နယ် ရဲတပ်ဖွဲ့မှူးနှင့် တာဝန်ရှိသူများက တရားခံများအား အမြန်ဆုံးဖမ်းဆီးရမိရေးအတွက် အပူတပြင်းဆောင်ရွက်နေစဉ် အဆိုပါ တရားခံ (၅)ဦးအနက် (၄) ဦးမှာ မန္တလေးမြို့ မဟာအောင်မြေမြို့နယ် ၆၂ လမ်း ၃၆/၃၇ လမ်းကြားရှိ SPACE BAR ဘီယာဆိုင်တွင်ရောက်ရှိနေကြောင်း သတင်းအရ မန္တလေးတိုင်းဒေသကြီးရဲတပ်ဖွဲ့ မှု/ကူဌာန ထံသို့ ဆက်သွယ်ချိတ်ဆက် ဖမ်းဆီးလိုက်ခြင်း ဖြစ်သည်။
ဓါးပြတိုက်သွားသူ တရားခံ (၅)ဦးအနက် ယခု ဖမ်းဆီးရမိသူများမှာ ပိုင်ထူးကျော် ၂၀ နှစ်(ဘ)ဦးသန်းလွင် ဗမာ/ဗုဒ္ဓ ကျဘမ်း လက်ပံတန်းကျေးရွာ အင်းတော်မြို့နယ်၊ မျိုးလှိုင်ဝင်း ၂၇နှစ် (ဘ)ဦးကျော်ဝင်း ဗမာ/ဗုဒ္ဓ ကျဘမ်း လက်ပံတန်းကျေးရွာ အင်းတော်မြို့နယ်၊ အောင်မိုးထွန်း ၂၁နှစ် (ဘ)ဦးမောင်ထွန်း ဗမာ/ဗုဒ္ဓ ကျဘမ်း လက်ပံတန်းကျေးရွာ အင်းတော်မြို့နယ်၊ နိုင်နိုင်ဦး(ခ)ငကဲ ၂၃နှစ် (ဘ)ဦးသိန်းထွန်း ဗမာ/ဗုဒ္ဓ ကျဘမ်း ထန်းတောကျေးရွာ အင်းတော်မြို့နယ် နေသူတို့ဖြစ်ပြီးသက်သေများနှင့်အတူ ဖမ်းဆီးရမိခဲ့သည်ဟု ရဲတပ်ဖွဲ့မှ သိရသည်။
၎င်းတို့အား စစ်ဆေးပေါ်ပေါက်ချက်အရ သက်သေခံ ပစ္စည်းများဖြစ်သည့် Kawasaki-Z 1000 တံဆိပ်ပါ အနက်ရောင်ဆိုင်ကယ်(၁)စီးနှင့် ၎င်းသော့ တစ်ချောင်း၊ YAMAHA MT-09 တံဆိပ်ပါ အနက်ရောင်ဆိုင်ကယ် (၂)စီးနှင့် ၎င်းသော့ (၂)ချောင်း၊ YINAMBO – 125 တံဆိပ်ပါ နီ/နက် ဆိုင်ကယ်(၁)စီးနှင့် ၎င်းသော့(၂)ချောင်း၊ CANDA- 125 တံဆိပ်ပါ စိမ်း/ပြာ ဆိုင်ကယ်(၁)စီးနှင့် ၎င်းသော့(၁)ချောင်း၊ အလေးချိန် ၁ ပိဿာ ၉ ပဲ ရွှေရည် ၁၄ ပဲ ၂ ပြားရည်ရှိသော အရည်ကျိုပြီး ရွှေခဲ(၉)ခဲ၊ အလေးချိန် ၁၆ ကျပ်သား ၆ ရွေး ရွှေရည်(၁၄)ပဲရည်ရှိ အရည်ကျိုပြီး ရွှေချောင်း(၁)ချောင်း၊ APPLE တံဆိပ်ပါ အဖြူရောင် I phone (၁)လုံး၊ မောင်မျိုးလှိုင်ဝင်း အမည်ပါနိုင်ငံသားစီစစ်ရေးကဒ်(၁)ခု၊ မောင်အောင်မိုးထွန်း အမည်ပါ နိုင်ငံသားစီစစ်ရေးကဒ်(၁)ခု၊ ပြောက်ကျားဘေးလွယ်အိတ်(၁)လုံး၊ ရွှေအရောင်းအဝယ် ဘောက်ချာ ဖြတ်ပိုင်းများ သက်သေများရှေ့မောက်တွင် ရှာဖွေသိမ်းဆည်းရမိခဲ့သည်။
အဆိုပါဖြစ်စဉ်နှင့် ပတ်သက်၍ ဓါးပြတိုက်ခဲ့သည့် လူငယ် (၅)ဦးအနက် ထွက်ပြေးလွတ်မြောက်နေသည့်ကျန်တစ်ဦးဖြစ်သော မောင်နန်းအောင်(ခ)ရဲထွန်းအောင် ဆိုသူအား ဆက်လက်ဖမ်းဆီးနိုင်ရေးနှင့် ဖမ်းဆီးရမိသူများအား ဥပဒေအရ အရေးယူနိုင်ရေး ဆောင်ရွက်ထား ကြောင်းသိရသည်
လှိုင်ဘွား (ဗန်းမောက်)