မြစ်ကြီးနားမြို့ပေါ် ရပ်ကွက်များအားလုံး ယခုလကုန်အထိ တစ်နာရီခြားတစ်ခါ အချိန်ပိုင်းမီးပြတ်တောက်မည်

Spread the love

EPN

မြစ်ကြီးနား၊နိုဝင်ဘာ ၁၁

မြစ်ကြီးနားမြို့ပေါ်ရှိ ရပ်ကွက်များအားလုံး ယနေ့မှစပြီး ယခုလ(၃၀)ရက်နေ့အထိ တစ်နာရီခြားတစ်ခါ အချိန်ပိုင်း မီးပြတ်တောက်မည်ဖြစ်ကြောင်း ဘူးဂါးလျှပ်စစ်ဓာတ်အားဖြန့်ဖြူးရေး ကုမ္ပဏီလီမိတက် တာဝန်ရှိသူတစ်ဦးထံမှ သိရသည်။

ယင်းကဲ့သို့ အချိန်ပိုင်းမီးပြတ်တောက်ရခြင်းမှာ မြန်မာ့လျှပ်စစ်ဓာတ်အားဖြန့်ဖြူးရေးဌာနမှ ဓာတ်အားပေးမှု မလုံလောက်သည့်အတွက် နိုင်ငံတော်ဓာတ်အားလိုင်းသုံးစွဲလျှက်ရှိသောဖီဒါများဖြစ်သည့် မြို့ပေါ်ရပ်ကွက်များအား နိုဝင်ဘာလ ၁၁ ရက်နေ့မှ စတင်ပြီး လကုန် ၃၀ ရက်နေ့အထိ နံနက် ၆ နာရီမှ ၁၀ နာရီ၊ ညနေ ၄ နာရီမှ ၈ နာရီအတွင်း တစ်နာရီခြား မီးပြတ်တောက်မှာဖြစ်ကြောင်း ဘူးဂါးလျှပ်စစ်ဓာတ်အားဖြန့်ဖြူးရေး လုပ်ငန်းမှ တာဝန်ရှိသူတစ်ဦးကပြောဆိုသည်။

“ဘာလို့မီးပြတ်တောက်ရတာလဲဆိုတော့ မြန်မာ့လျှပ်စစ်ဓာတ်အားဖြန့်ဖြူးရေးဌာနကနေ ကျွန်တော်တို့အတွက် ဓာတ်အားပေးမှုကမလုံလောက်ဘူး၊သူတို့ကဒီလောက်ပေးတယ်ဆိုရင် ပေးတဲ့အပေါ်မှာ ပြန်ဖြန့်ဖြူးပေးရတာဖြစ်တဲ့အတွက် အခုမြစ်ကြီးနားမြို့ပေါ်ရပ်ကွက်တွေအားလုံးကို အချိန်ပြည့်ပေးဖို့က နိုင်ငံတော်ဓာတ်အားကမလုံလောက်ဘူး ဒါကြောင့်အလှည့်ကျ တစ်နာရီခြားပြီး မီးပေးဖို့အတွက် စီစဉ်ရတာဖြစ်တယ်”ဟု ၎င်းကဆိုသည်။

ဘူးဂါးလျှပ်စစ်ကုမ္ပဏီအနေဖြင့် ရေအားလျှပ်စစ် စက်ရုံများတွင် ဓာတ်အားလုံလောက်မှုမရှိသည့်အတွက် ပြီးခဲ့သည့် ၂၀၂၀ ခုနှစ် မတ်လ ခန့်မှစတင်ကာ မြန်မာ့လျှပ်စစ်ဓာတ်အား ဖြန့်ဖြူးရေးလုပ်ငန်းမှ ဝယ်ယူပြီး မြစ်ကြီးနားတစ်မြို့လုံးဖြန့်ဖြူးပေးခဲ့ခြင်းဖြစ်သည်။

မြစ်ကြီးနားမြို့အတွက် မီးအသုံးပြုမှုမှာ မဂ္ဂါဝပ် ၃၀ ခန့်ရှိပြီး ဝိုင်းမော်အတွက် အမြင့်ဆုံး အသုံးပြုမှုဟာ ၅ မဂ္ဂါဝပ် ရှိသည့်အတွက် နိုဝင်ဘာလကုန်အထိ ဓါတ်အားမလုံလောက်မှုနှင့်ကြုံတွေ့မှာဖြစ်ကြောင်း ဘူးဂါးလျှပ်စစ်ဓာတ်အားဖြန့်ဖြူးရေး လုပ်ငန်းမှ သိရသည်။

မြို့ပေါ်ရပ်ကွက်များကို အချိန်ပိုင်းမီးပေးသည့်အချိန်တွင် မီးသုံးစွဲသည့်ပြည်သူများအနေဖြင့် မီးခလုပ်များ၊လျှပ်စစ်နှင့်သက်ဆိုင်သည့်ပစ္စည်းများ၊အပူလွန်ကဲပြီးလျှော့ဖြစ်စေနိုင်သည့်ပစ္စည်းများကို ဂရုတစိုက် လုပ်ဆောင်ထားဖို့လိုအပ်ကြောင်းလည်း သတိပေးပြောဆိုထားသည်။

လင်းယုန်

Spread the love