ပင်လယ်ဘူးမြို့နယ်တွင် မူးယစ်ဆေးဝါးများ ရောင်းချနေသူကို မြို့မရဲစခန်းမှ ဖမ်းဆီးရမိ
EPN
ပင်လည်ဘူး၊ မတ် ၂၃
ဖြစ်စဉ်မှာ မတ်လ ၂၂ ရက်နေ့ မွန်းလွဲ ၂ နာရီခန့်က ပင်လည်ဘူးမြို့နယ်၊ ရှင်ဖာကျေးရွာနေ ရဲမောင် ၃၅ နှစ်၏ နေအိမ်၌ မူးယစ်ဆေးဝါးသတင်းအရ မြို့နယ်ရဲတပ်ဖွဲ့မှူး၏ မူးယစ်ဆေးဝါးရှာဖွေဖမ်းဆီးခွင့်ဝရမ်းအမှတ် (၅၃/၂၀၂၀)ဖြင့် နယ်ထိန်းခေါင်းဆောင် ဒုရဲအုပ် အုန်းခိုင်၊ တပ်ကြပ် ရန်မျိုးအောင်၊ ဒုတပ်ကြပ် ထွန်းမင်းလတ် တို့အဖွဲ့က သက်သေ ကျေးရွာအုပ်ချုပ်ရေးမှူး ဦးလူရင်၊ ဦးစိန်ဖေ တို့နှင့်အတူ ဝင်ရောက်ရှာဖွေရာ ရဲမောင် ကို ၎င်း၏ နေအိမ်တွင် ဖမ်းဆီးရမိခဲ့ခြင်းဖြစ်သည်။
၎င်းနှင့်အတူ နေအိမ်အနောက်ဘက် မီးဖိုဆောင် ပန်းကန်ဆေးသည့်နေရာရှိ ကြမ်းပြင်ပေါ်၌ အနက်ရောင်ကြွပ်ကြွပ်အိတ်ဖြင့်ထည့်ထားသည့် ဘိန်းဖြူဟု ယူဆရသော ဖြူ/ဝါရောင်အမှုန့် အလေးချိန် (၉)ဂရမ်ခန့်စီပါ ရောင်စုံဆပ်ပြာခွက် (၁၆)ခွက်၊ အလေးချိန် (၅)ဂရမ်ခန့်ပါ အနီရောင်ဆပ်ပြာခွက် (၁)ခွက်၊ စုစုပေါင်းဆပ်ပြာခွက် (၁၇)ခွက်မှ အလေးချိန် (၁၄၉)ဂရမ်ခန့် နှင့် BAOBA စာတမ်းပါ အနက်ရောင် ကျောပိုးအိတ်အတွင်းမှ အပြာရောင်ကပ်ခွာအိတ်ဖြင့် ထည့်လျက် WY စာတမ်းပါ ပန်းရောင်စိတ်ကြွရူးသွပ်ဆေးပြား (၁၀၀)ပြားပါ အထုပ် ၁ ထုပ်၊ (၉၀)ပြားပါအထုပ် ၁ ထုပ်၊ စုစုပေါင်းအထုပ် ၂ ထုပ်မှ ဆေးပြား (၁၉၀)ပြား၊ အလေးချိန် (၁၉)ဂရမ်ခန့် တွေ့ရှိသိမ်းဆည်းခဲ့သည်။
ဖြစ်စဉ်များနှင့်ပတ်သက်၍ မူးယစ်ဆေးဝါး ဘိန်းဖြူမှုန့်များနှင့် စိတ်ကြွရူးသွပ်ဆေးပြားများ လက်ဝယ်ထားရှိသူ ရဲမောင် ၃၅ နှစ်၊(ဘ) ဦးလှဦး၊ ရှင်ဖာကျေးရွာ၊ ပင်လည်ဘူးမြို့နယ်နေသူအား ဒုရဲအုပ် အုန်းခိုင်က တရားလိုပြုလုပ်၍ တိုင်တန်းခဲ့သဖြင့် ပင်လည်ဘူးမြို့မရဲစခန်းက မယ(ပ)၄၃/၂၀၂၀၊ မူး/စိတ် ပုဒ်မ-၁၉(က) ဖြင့် အမှုဖွင့် ဖမ်းဆီးအရေးယူ ဆောင်ရွက်လျက်ရှိကြောင်း သိရသည်။
ဗန်းမော်သုခမိန်