ကချင်ပြည်နယ် မိုးမောက်တွင် တပ်မတော်နှင့် KIA ၊PDF အဖွဲ့များ ထိထွေ့ တိုက်ပွဲဖြစ်ပွားခဲ့

Spread the love

EPN

မြစ်ကြီးနား ၊ နိုဝင်ဘာ ၁၂

ကချင်ပြည်နယ် မိုးမောက်မြို့နယ်အတွင်း လုံခြုံရေးအဖွဲ့မှ မိုင်းရှင်းလင်းရေးလုပ်ငန်းများ ဆောင်ရွက်စဉ် KIA အဖွဲ့နှင့် PDF အမည်ခံ များက အခြေခံပညာ အထက်တန်းကျောင်း၏ ပင်မစာသင်ဆောင်မှလည်းကောင်း၊ လမ်း၏ညာဘက်ခြမ်း မီတာ ၃၀ ခန့်အကွာ လူနေအိမ်များမှ အကာ အကွယ်ယူ၍ လက်နက်ကြီး၊ လက်နက်ငယ်များဖြင့် စတင်ပစ်ခတ် တိုက်ခိုက်လာခဲ့သဖြင့် လုံခြုံရေးတပ်ဖွဲ့ဝင်များက ပြန်လည်ပစ်ခတ်ခဲ့ပြီး အပြန်အလှန်ထိတွေ့မှုဖြစ်ပွားခဲ့ကာ ပစ်ခတ်မှုများဖြစ်ပွားခဲ့ကြောင်း သိရသည်။

ဖြစ်စဉ်မှာ နယ်မြေလုံခြုံရေးနှင့် တရားဥပဒေစိုးမိုးရေး ဆောင်ရွက်လျက်ရှိသည့် လုံခြုံရေးတပ်ဖွဲ့ဝင်များ အနေဖြင့် ယမန်နေ့ နံနက်ပိုင်း၌ မိုးမောက်မြို့ရှိ အခြေခံပညာအထက်တန်း ကျောင်းရှေ့ လမ်းဆုံနေရာသို့ ရောက်ရှိစဉ် KIA အဖွဲ့နှင့် PDF အမည်ခံ အကြမ်းဖက်သမားများ ထောင်ထားသည့် ရီမုမိုင်းသုံးလုံးကို တွေ့ရှိခဲ့သဖြင့် အများပြည်သူများ အန္တရာယ်မရှိစေရေး မိုင်းရှင်းလင်းရေးလုပ်ငန်း များ ဆောင်ရွက်နေစဉ် KIA၊ PDF အဖွဲ့များမှ စတင်ပစ်ခတ်ခဲ့ခြင်းဖြစ်ကြောင်း န.စ.က အဖွဲ့မှ ထုတ်ပြန်ထားသည်။

ထို့နောက် မိုးမောက်မြို့ အခြေခံပညာ အထက်တန်းကျောင်းဝင်းအတွင်း မိုင်းရှင်းလင်းရေး လုပ်ငန်းများ ဆောင်ရွက်ခဲ့ရာ ကျောင်းဝင်း အတွင်းရှိ သစ်ပင်တွင် ကပ်၍ထောင်ထားသည့် ဒေသန္တရလက်လုပ် ရီမုမိုင်းတစ်လုံးကို ထပ်မံတွေ့သိမ်းဆည်းရမိခဲ့ပြီး အကြမ်းဖက်သမား များအနေဖြင့် ၎င်းတို့ဆုတ်ခွာရာ လမ်းကြောင်းတစ်လျှောက်ရှိ နေအိမ်အချို့အား မီးရှို့ဖျက်ဆီး ခဲ့သည့်အတွက် လုံခြုံရေးတပ်ဖွဲ့ဝင်များက နယ်မြေခံမီးသတ်တပ်ဖွဲ့ဝင်များနှင့် ပူးပေါင်း၍ မီးငြိမ်းသတ်ရေးလုပ်ငန်း များကို ဆောင်ရွက်ပေးခဲ့ကြောင်း ဖော်ပြထားသည်။

ယခုကဲ့သို့ အများပြည်သူသွားလာအသုံးပြုလျက်ရှိသည့် လမ်းမကြီး များပေါ်၌ လည်းကောင်း၊ ပညာရေးဆိုင်ရာ အဆောက်အဦများအတွင်း၌ လည်းကောင်း မိုင်းထောင်ဖောက်ခွဲမှုများနှင့် လူနေအိမ်နှင့် စာသင် ကျောင်းများကို အကာအကွယ်ယူတိုက်ခိုက်ခဲ့သည့် အကြမ်းဖက်မှု လုပ်ရပ် ကျူးလွန်ခဲ့သူများအား ဥပဒေနှင့်အညီ ထိရောက်စွာအရေးယူနိုင်ရေး လုံခြုံရေး တပ်ဖွဲ့ဝင်များက စုံစမ်းဖော်ထုတ်လျက်ရှိကြောင်းနှင့် ဒေသအတွင်း လှုပ်ရှားသွားလာလျက်ရှိသည့် ဒေသခံပြည်သူများ အန္တရာယ်မဖြစ်စေရေးအတွက် မိုင်းရှင်းလင်းရေး လုပ်ငန်းများနှင့် နယ်မြေလုံခြုံအေးချမ်း တည်ငြိမ်ရေးလုပ်ငန်းများကို စဉ်ဆက်မပြတ် ဆက်လက်ဆောင်ရွက်သွားမည်ဖြစ်ကြောင်း ထုတ်ပြန်ထားသည်။

Spread the love